Rapa maarufu wa Kanada, Drake, anaonekana kumkosoa rapa na mtayarishaji mwenye asili ya Kipalestina, DJ Khaled, kwa kukosa kuonyesha wazi uungwaji mkono wake kwa Palestina. Ukosoaji huo unaonekana katika wimbo uliomo kwenye albamu yake mpya Iceman.

Albamu hiyo ni moja kati ya albamu tatu ambazo Drake aliwashangaza mashabiki wake kwa kuzitoa siku ya Ijumaa. Hata hivyo, ni mstari katika wimbo Make Them Pay uliovutia zaidi mjadala mtandaoni.

Katika mstari huo, Drake anaonekana kurejelea moja kwa moja suala la Palestina pamoja na DJ Khaled, ambaye jina lake halisi ni Khaled Mohammed Khaled. Kauli hiyo imezua maoni tofauti kwenye mitandao ya kijamii huku baadhi ya watumiaji wakitafsiri kuwa ni ukosoaji wa moja kwa moja kwa DJ Khaled.

DJ Khaled amekuwa akikabiliwa na ukosoaji kutoka kwa mashabiki, wanaharakati na baadhi ya watu mashuhuri tangu mwaka 2023 kwa madai ya kutotoa msimamo wazi kuhusu mashambulizi ya Israel huko Gaza.