Naibu Kamanda Mkuu wa Jeshi la Walinzi wa Mapinduzi ya Kiislamu la Iran (IRGC), Meja Jenerali Izadi, amesema Iran iko tayari kukabiliana na shambulizi lolote kutoka Marekani na Israel.
Akizungumza kuhusu uwezo wa kijeshi wa nchi hiyo, Izadi amesema vikosi vya Iran vimejiandaa katika maeneo ya ardhini, baharini, angani, ulinzi wa anga na usalama, huku akionya kuwa jaribio lolote la kuivamia Iran litakabiliwa na upinzani mkali.
“Iwapo adui ataishambulia nchi yetu, tutasimama imara hadi mwisho na hatutamruhusu kuteka hata kipande kidogo cha ardhi ya Iran,” amesema Izadi, akirejelea msimamo wa Iran wakati wa vita vya miaka ya 1980.
Izadi amesema Iran itaendelea kuunga mkono makundi ya Mhimili wa Muqawama katika eneo la Mashariki ya Kati, akidai kuwa maadui wa nchi hiyo wako katika hali ya udhaifu.
Aidha, amedai kuwa Marekani ilikabiliwa na kushindwa nchini Iraq kama ilivyokuwa Afghanistan, huku akiwataka wananchi wa Iraq kudumisha umoja ili kulinda nchi yao na maadili yao.
Chanzo: Tasnim News.
Maoni