Kamanda Mkuu wa Majeshi ya Iran, Ayatollah Seyyed Mojtaba Khamenei, amesisitiza umuhimu wa kuimarisha utayari wa kijeshi wa nchi hiyo kwa ajili ya kukabiliana na maadui, akieleza kuwa tishio lolote dhidi ya Iran linapaswa kujibiwa mara moja na kwa ufanisi, bila kujali eneo lilipotokea.
Kauli hiyo imetolewa katika mkutano wake na makamanda wakuu wa Vikosi vya Wanajeshi vya Iran, ambapo alieleza kuwa utayari wa kijeshi wenye busara kwa ajili ya makabiliano makubwa ni miongoni mwa nguzo za kuimarisha uwezo wa Iran wa kuzuia mashambulizi ya maadui.
Khamenei alisema iwapo maadui wataanzisha tena mashambulizi ya kijeshi au ya kigaidi, Vikosi vya Wanajeshi vya Iran pamoja na wananchi wake ndivyo vitakavyoamua muda na masharti ya kumalizika kwa mapambano hayo.
Katika maelekezo yake, alisisitiza pia umuhimu wa kuimarisha mifumo ya kijasusi ya kijeshi, kuendeleza uwezo wa ulinzi wa ndani kupitia maboresho ya mafundisho na mbinu za kivita, pamoja na kutumia teknolojia za kisasa kukuza uwezo wa ulinzi na usalama.
Aidha, alitaka kuimarishwa kwa misingi ya kiroho na ari ya kijeshi miongoni mwa wanajeshi, huku akisisitiza kuwa juhudi za kukidhi mahitaji yao ya maisha na kuwapa msaada zinapaswa kuendelea bila kukatizwa.
Katika sehemu nyingine ya maelekezo yake, Khamenei aliagiza orodha ya malengo ya kijeshi kusasishwa ili kujumuisha aina zote za mali na rasilimali za kimwili na zisizo za kimwili za kile alichokiita adui wa Marekani na Israel, akisema zinapaswa kuwa ndani ya wigo wa uwezo wa Vikosi vya Wanajeshi vya Iran.
Alitaja pia uungwaji mkono wa wananchi kwa majeshi ya nchi hiyo kuwa nguzo muhimu ya kuzuia vitisho dhidi ya Iran. Alisema uwepo wa wananchi katika medani mbalimbali kwa kipindi cha miezi minane unaendeleza historia ya kile Iran inachokiita Vita Vitakatifu vya Ulinzi vya miaka minane.
Kwa mujibu wa Khamenei, mshikamano huo wa wananchi, pamoja na msimamo wa majeshi, polisi na vikosi vya Basij, umekuwa na mchango katika kulinda mipaka ya Iran na mfumo wake wa kisiasa.
Vilevile, Kiongozi huyo alisifu msimamo wa kile kinachojulikana kama Mhimili wa Muqawama katika nchi mbalimbali, akisisitiza kuwa mshikamano wa medani tofauti ni jambo lenye athari za kimkakati katika kuunda upya mfumo wa kisiasa na kiusalama wa Asia Magharibi.
Alieleza matumaini yake kuwa mpangilio huo mpya utachochea umoja mkubwa zaidi kati ya mataifa na serikali za Kiislamu, kuelekea kile alichokiita kuundwa kwa ustaarabu mpya wa Kiislamu.
Maoni